کوسموشم بیرده باریشمام داحا یالوارما منه

 

تکلیغین لاییقی سن گئت بالا یالوارما منه

 

نئچه ایل نازیوی چکدیم ولی سن ظولم ائله دین

 

ایندی ده ای داش اورک دؤن داشا یالوارما منه

 

منیم آغلار گؤزومه رحم ائلییب هن دئمه دین

 

ایندی گر گؤز یاشین آخسا چایا یالوارما منه

 

یالواریردیم سنی من ، سن چؤووروردون اوزووی

 

ایندی ده کئچمیشی سن سال یادا یالوارما منه

 

سن اُوزون داشلامیسان باغدا گولون بولبولونی

 

گله بولمز یئنه بولبول باغا یالوارما منه

 

دئدیم گل با هم اولاق ساده دوتوب خوش یاشایاق

 

سئومه دین پس داحا گئت تک یاشا یالوارما منه